काठमाण्डौ । तमू ह्युल छोंज धीं गुरुङ राष्ट्रिय परिषदले किरात याक्थुङ चुम्लुङ र ज्यापु समाज यलसँग साँगठनिक असल अभ्यास बारे छलफल र अन्तरक्रिया गरेको छ । परिषद्ले केन्द्रीय कार्यसमिति बैठकको पूर्व सन्ध्यामा शुक्रबार एक कार्यक्रमबिच संस्थागत रुपमा एकअर्काको संस्थाले संस्थागत विकासको क्रममा गरेका असल अभ्यासका बारे छलफल र अन्तरक्रिया गरेको हो ।
आदिवासी याक्थुम लिम्बुहरुको छाता संगठन किरात याक्थुम चुम्लुङको केन्द्रिय कार्यालय नखिपोट ललितपुरमा पुगेर परिषद्को केन्द्रीय समिति सहित तमूस्यो ह्युल, यवा ह्युल, तमू विद्यार्धी र तमू पत्रकारहरुको समेत सहभागितामा आ–आफ्नो अनुभव (असल अभ्यास) अदान प्रदान गरेको थियो भने सोही दिन बालकुमारी ललितपुरमा अवस्थित ज्यापु समाज यलमा पुगेर उक्त संस्थाले गरेका असल अभ्यास बारे पनि आदानप्रदान गरिएको थियो ।
परिषद्को सम्पूर्ण कार्यसमितिले किरात र ज्यापू संग्राहलयको अवलोकन पनि गरेको छ । यस्तो खाले असल अभ्यास आदानप्रदान कार्यक्रमले भविष्यमा नेपालका आदिवासी समुदायहरुबीच सहकार्य गर्ने अवसरलाई बढावा दिने विश्वास गरीएको तमू ह्युल छोंज धीं गुरुङ राष्ट्रिय परिषद्का अध्यक्ष धनमान गुरुङले बताए ।
