काठमाडौं । पूर्वप्रशासक स्वर्गीय रत्नबहादुर गुरुङ र उहाँकी धर्मपत्नी स्वर्गीय दिलमाया गुरुङको नाममा नामाकरण गरिएको ‘दिल–रत्न गुरुङ मार्ग’ को उद्घाटन गरिएको छ । काठमाडौं महानगरपालिका वडा नम्बर २८ बागबजार स्थित गुरुङ टोलसमेत भनेर चिनिने स्थानमा रहेको दिल–रत्न गुरुङ मार्गको आइतबार एक समारोहकाबीच उद्घाटन गरिएको हो ।
बागमती प्रदेस सभा सदस्य हरिप्रभा खड्गी र स्वर्गीय रत्नबहादुर गुरुङकी भान्जी राजकुमारी गुरुङले संयुक्त रुपमा ‘दिल–रत्न गुरुङ मार्ग’ को उद्घाटन गर्नुभयो । उद्घाटनका क्रममा काठमाडौं महानगरपालिका वडा नम्बर २८ का वडाध्यक्ष भाइराम खड्गी, बाग बजार सरोकार समितिका सचिव सुनिल बैद्य र सुसन बैद्यको उपस्थिति थियो । ‘दिल–रत्न गुरुङ मार्ग’ को उद्घाटनको अवसरमा तमू बौद्ध सेवा समिति काठमाडौं, सोंपाल तमू समाज, काठमाडौं, चारभञ्ज्याङ तमू समाज काठमाडौंका अध्यक्ष र पदाधिकारीसहित सदस्यहरुको उपस्थिति रहेको थियो । कार्यक्रममा बागमती प्रदेस सभा सदस्य हरिप्रभा खड्गीले पूर्वप्रशासक स्वर्गीय रत्नबहादुर गुरुङ र स्वर्गीय दिलमाया गुरुङको सम्झनामा उहाँहरुका छोरा, छोरीहरुले उदाहरणीय कार्य गरेको भन्दै दिल–रत्न गुरुङ मार्ग उद्घाटन कार्यक्रमको प्रशंसा गर्नुभयो ।
त्यस्तै काठमाडौं महानगरपालिका वडा नम्बर २८ का वडाध्यक्ष भाइराम खड्गीले स्वर्गीय गुरुङ दम्पत्तीले श्याल दौडने काठमाडौंको बागबजार क्षेत्रलाई गुल्जार बनाएको स्मरण गर्दै अहिले उहाँहरुका सन्ततीहरुले गरेको कामको मुक्तकण्ठले प्रशंसा गर्नुभयो । त्यसैगरी बागबजार सरोकार समितिका सचिव सुनिल बैद्य र सुसन बैद्यले पनि गुरुङ दम्पत्तिको स्मरण गर्दै उहाँहरुको ईतिहास जोगाउने कार्य भएको भन्दै खुसी व्यक्त गर्नुभयो । कार्यक्रममा स्वर्गीय रत्नबहादुर गुरुङ र दिलमाया गुरुङका कान्छा ज्वाईं ईन्जिनीयर नारायणबहादुर गुरुङले आफ्ना सासु र ससुराको स्मरण गर्दै पुर्खाको किर्ती र गौरव जोगाउने काममा सघाएको विचार व्यक्त गर्नुभयो । त्यसक्रममा कान्छी छोरी ममता गुरुङ र माइली छोरी कमला गुरुङले आफ्ना स्वर्गीय माता, पिताको स्मरण गर्दै उहाँहरुको योगदानको चर्चा गर्नुभयो ।
गण्डकी प्रदेश अन्तर्गत स्याङ्जा जिल्लाको अर्जुनचौपारी गाउँपालिका वडा नम्बर ५ दरौं गाउँमा विक्रम सम्वत १९८२ बैशाख २५ गते रत्नबहादुर गुरुङको जन्म भएको थियो । अहिले लोकप्रिय प्रशासकका रुपमा चर्चित रत्नबहादुर गुरुङ २००७ सालमा राणा शासनविरुद्धको आन्दोलनमा सक्रिय सहभागी हुनुभएको थियो । तत्कालिन मुक्तिसेनाले स्याङ्जा जिल्ला कब्जा गरेपछि गठित स्थानीय सरकारको गृहसहायक मन्त्री नियुक्त हुनु भयो । राणा शासनको अन्त्य भइ २००७ साल फागुन ७ गते केन्द्रीय सरकार अर्थात मन्त्रिपरिषद गठन भएपछि स्याङ्जा जिल्ला अदालतको माइला बिचारीमा नियुक्त हुनुभयो । स्वर्गीय गुरुङ २०१७ फागुन ३ गते राजा महेन्द्रबाट प्युँठान गौंडाको बडाहाकिम नियुक्त हुनुभयो ।
त्यस्तै २०२१ सालमा धनकुटा गौंडाको बडाहाकिम बन्नुभयो । २०२२ सालमा बडाहाकिमको पद खारेज भएलगत्तै लुम्बिनी अञ्चलको सहायक अञ्चलाधीश नियुक्त हुनुभयो । त्यसैगरी सेती अञ्चलको अञ्चलाधीशको कार्यभार पुरा गरी विक्रम सम्वत २०४३ सालमा ३२ वर्षे सेवा पुरा गरी अवकाश प्राप्त गर्नुभयो । विक्रम सम्वत २०३४ सालमा काठमाडौंको बागबजारमा बसोबास सुरु गुर्नुभएका पूर्वप्रशासक रत्नबहादुर गुरुङको ८२ वर्षको उमेरमा २०६४ असोजमा आफ्नै निवासमा स्वर्गारोहण भएको थियो । पूर्वप्रशासक स्वर्गीय रत्नबहादुर गुरुङकी धर्मपत्नी स्वर्गीय दिलमाया गुरुङको साउन ४ गते सोमबार पर्ने जन्मजयन्तीको सन्दर्भमा अघिल्लो दिन आइतबार दिल–रत्न गुरुङ मार्गको उद्घाटन गरिएको हो ।
काठमाडौं महानगरपालिका वडा नम्बर २८ वडा कार्यालयबाट गत असार ८ गते सोमबार दिल–रत्न गुरुङ मार्ग नामाकरणको स्वीकृति प्राप्त भएको थियो । बाटो कायम गर्न गुरुङ परिवारले तीन आना निजी जग्गा प्रदान गरेका हुन ।
