काठमाण्डौ । हालै सम्पन्न प्रतिनिधि सभाको निर्वाचनमा नवनिर्वाचित २७४ जना सांसदहरु मध्य गुरुङ समुदायबाट ५ जना सांसदको सहभागिता रहेको छ । उनीहरु सबैले आज प्रतिनिधि सभाका ज्येष्ठ सदस्य अर्जुननरसिंह केसीबाट पद तथा गोपनीयताको शपथ लिँदै छन् ।
नयाँ सांसदमा गुरुङ समुदायबाट प्रत्यक्षतर्फ रास्वपाबाट गोरखा १ का सुजन गुरुङ, कास्कि २ का बिना गुरुङ, समानुपातिकतर्फ गोरखाका एलिजा गुरुङ र नेपाली काँग्रेसको प्रत्यक्षतर्फ टेक बहादुर गुरुङ समानुपातिकबाट गीता गुरुङ रहेका छन् ।
नेपालको संविधानले मातृभाषामा शपथ लिन पाउने व्यवस्था गरेको छ तर नवनिर्वाचित गुरुङ सांसदहरुको प्राथमिकतामा मातृभाषा परेन । बुधबार साँझ ५ बजेसम्म ५४ जना सदस्यले मातृभाषामा शपथ लिने जानकारी संसद् सचिवालयलाई गराएका छन् जसमा कुनैपनि गुरुङ समुदायका सांसदले मातृभाषामा शपथ लिन निवेदन दिएका छैनन् ।
नेपालीबाहेक मैथिली, भोजपुरी, नेपाल भाषा, बज्जिका, रानाथारू, थारूलगायतका भाषामा शपथ लिने नवनिर्वाचित सदस्यले सचिवालयलाई जानकारी गराएका छन् । नवयुवा पुस्ताको आन्दोलनको जगमा भएको निर्वाचनबाट निर्वाचित सदस्यको शपथपछि कार्यकाल सुरु हुने छ ।
