मकाउ । गुरुङ (तमु) समाज मकाउले यस वर्षको महान तमु पर्व तमु ल्होछार भव्य रूपमा मनाउने तयारी गरेको जनाएको छ। समाजका अनुसार आगामी २०२५ पुस १५ गते, मंगलबार (अंग्रेजी मिति ३० डिसेम्बर २०२5, Tuesday) का दिन मकाउको हाक्शा बिचमा विशेष कार्यक्रम सहित तमु ल्होछार मनाइनेछ।
समाजले मकाउमा बसोबास गर्ने सम्पूर्ण गुरुङ (तमु) दाजुभाइ–दिदीबहिनीहरू तथा गैर–तमु समुदायलाई पनि कार्यक्रममा उपस्थित भएर सहभागिता जनाइदिन हार्दिक निमन्त्रणासहित अनुरोध गरेको छ। विशेषगरी तमु समुदायलाई आफ्नो मौलिक चाड–पर्व जोगाउन तथा एकताको भावना बढाउन उपस्थिती जनाउन समाजले आग्रह गरेको छ।
समाजका अध्यक्ष लिल बहादुर गुरुङ ‘गोरे’ ले विदेशमा बसोबास गर्दा पनि भाषा, कला, संस्कार र सांस्कृतिक पहिचान जोगाइराख्न यस्ता पर्वहरूको महत्वपूर्ण भूमिका रहने बताउँदै, कार्यक्रममा दिल खोलेर साथ, सहयोग, सल्लाह–सुझाव प्रदान गर्न सबैलाई अनुरोध गरेका छन्।
कार्यक्रम सम्बन्धी थप जानकारीका लागि समाजका पदाधिकारी तथा कार्यसमितिका सक्रिय सदस्यहरूलाई सम्पर्क गर्न सकिने समाजले जनाएको छ।
समाजले विदेशमा रहेका तमु दाजुभाइ–दिदीबहिनीलाई एउटै थलोमा भेला भई चाडपर्वलाई उल्लासपूर्वक मनाएर सांस्कृतिक पहिचान बलियो बनाउन अपिल गर्दै सम्पूर्णलाई आगामी तमु ल्होछारको हार्दिक शुभकामना व्यक्त गरेको छ।
