लण्डन । लन्डन इन्टरकन्टिनेन्टल कपमा प्रतिस्पर्धा गरेर फर्किएको ६ सदस्यीय नेपाली महिला सेरेब्रल पाल्सी फुटबल टोलीलाई तमू समाज यूकेले भव्य स्वागत तथा सम्मान गरेको छ। बेलायत भ्रमणमा रहेको टोलीलाई तमू समाज यूकेको आफ्नै सामुदायिक भवन बारहम पार्क वेम्ब्लीमा स्वागत तथा सम्मान गरेको हो।
अगस्त १७ देखि २३ सम्म बेलायतको मिडल्याण्डस्थित लबरोमा भएको महिला इन्टरकन्टिनेन्टल कपमा उनीहरुले सहभागिता जनाएका थिए। नेपाली टोलीमा चार सेरेब्रल पाल्सी भएका खेलाडी, एक प्रशिक्षक र एक अफिसियल गरी ६ जना सदस्य थिए।
टोलीमा प्रशिक्षक सदीक्षा मल्ल र अफिसियल सविना पराजुलीका साथै खेलाडीहरू रेवती कार्की, निरमाया मगर, रेणु भोलान र मुना श्रेष्ठ थिए।
खेलले अशक्तता भएका महिला खेलाडीहरूलाई आफ्नो शारीरिक क्षमता, आत्मविश्वास र टोली भावना प्रदर्शन गर्ने अवसर दिन्छ। खेलको उद्देश्य सबैलाई बराबरी अवसर दिलाउनु, खेलकुदको आनन्द लिन सक्ने वातावरण बनाउनु र अन्तर्राष्ट्रिय स्तरसम्म प्रतिस्पर्धा गर्न प्रेरित गर्नु हो। सरल भाषामा भन्नुपर्दा सेरेब्रल पाल्सी फुटबल भनेको अशक्तता भएका महिलाहरूलाई पनि फुटबल खेल्न र प्रतियोगितामा भाग लिन सक्ने अवसर दिने समावेशी खेल हो।
खेलको औपचारिक समापनपछि तमू समाज यूकेको प्रायोजनमा टोलीलाई दुई दिन लन्डनमा होटेल बसाइ र भ्रमणको व्यवस्था मिलाइएको थियो। उनीहरुको लागि खाने र बस्ने व्यवस्था तमू समाज युकेले गरेको थियो।
साँझ समाजको सामुदायिक भवनमा आयोजित कार्यक्रममा कार्यकारी समितिका महासचिव सुव घले, कोषाध्यक्ष चन्द्रकान्त गुरुङ, संस्थापक अध्यक्ष चित्रबहादुर गुरुङ, निवर्तमान अध्यक्ष शिवकुमार गुरुङ, पूर्वअध्यक्ष अर्जुनकुमार गुरुङ र शिवचन्द्र गुरुङ, आमा समूहकी अध्यक्ष विमला गुरुङ, आमा समूहकी पूर्व अध्यक्ष माया गुरुङ, सल्लाहकार तथा युवा समूहका अध्यक्ष प्रज्वलमान गुरुङसहित अन्य सदस्यहरूको उपस्थित थिए।
दिउँसो खेलाडीहरुलाई तमू समाज युकेकी अध्यक्ष विन्दु घले, आमा समूहकी अध्यक्ष विमला गुरुङ तथा युवा सदस्य सुविना घलेले लन्डनका प्रमुख स्थलहरूको भ्रमण गराएका थिए। दिनभरको यात्राले थकित खेलाडीहरूले सुरुमा स्वादिष्ट नेपाली खानाको आनन्द लिएपछि औपचारिक कार्यक्रम सुरु भएको थियो।
समारोहमा अध्यक्ष विन्दु घलेले टिम म्यानेजर सदीक्षा मल्लसहित सम्पूर्ण टोलीको परिचय गराएपछि संस्थापक अध्यक्ष चित्रबहादुर गुरुङले तमू समाज युकेको परोपकारी कार्य र उद्देश्यबारे संक्षिप्त जानकारी दिएका थिए।
टिम म्यानेजर तथा प्रशिक्षक सदीक्षा मल्लले निकै भावुक हुँदै भनिन्, ‘प्रतियोगितामा भाग लिन तयारी गर्दा देखि नै हामीले विभिन्न किसिमका कठिनाइ व्यहोर्नु पर्यो। विकसित देशका खेलाडीहरूसँग प्रतिस्पर्धा गर्नु हाम्रो लागि ठूलो चुनौती थियो। तर पहिलोपटक नेपाली पाल्सी फुटबल टोलीलाई युरोपमा चिनाउने अवसर पाउनु गर्वको कुरा हो। हाम्रो टोलीले अनुशासित ढंगले खेल प्रदर्शन गरी सबैको मन जितेको छ।’
बेलायतमा रहेका तमू समाज युकेसहितका नेपाली समाजबाट पाएको सहयोग, स्वागत र सम्मानले खेलाडीहरुको आत्मबल बढेको उनले बताइन्।
