चितवन । लण्डनको केम्पटन पार्कमा आयोजित नेपाली मेलामा विभिन्न जातजातिका प्रतिनिधिहरूको र्याली प्रदर्शन गरेका छन्। नेपाली कला, संस्कृति र परम्परालाई एकै ठाउँमा प्रस्तुत गरिएको आयोजकले जनाएको छ।
सन् २००९ देखि निरन्तरता पाएको नेपाली मेलामा हरेक वर्ष आगन्तुकको सङ्ख्या पनि बढ्दै गएको आयोजकको दाबी छ। तमू धीँ युकेका अध्यक्ष जुमकाजी गुरूङका अनुसार यस पटकको मेलामा १२ हजारभन्दा बढी दर्शक सहभागी भएको अनुमान गरिएको छ। ‘मेला पूरै अवलोकन गर्दा हामीले नेपालमै भएको महसुस गर्यौँ,’ उनले भने।
मेलामा गुरुङ समुदायको घ्याब्री, पच्यु, लामा नृत्य, मगर, राई, नेवारहरुको लाखे नृत्यलगायत विभिन्न सांस्कृतिक कार्यक्रम आयोजना गरिएको थियो। १५ भन्दा बढी लोकनृत्य र ३५ वटा सांस्कृतिक कार्यक्रम प्रस्तुत गरिएको उपाध्यक्ष कमल गुरुङले जानकारी दिए।
वेलायतका लागि नेपाली राजदुत चन्द्रकुमार घिमिरेद्वारा जिफानका पूर्वअध्यक्ष तथा गण्डकी प्रदेशका पूर्वमन्त्री वेदबहादुर गुरुङ (श्याम), नेपाल विद्युत प्राधिकरणका पूर्व कार्यकारी निर्देशक कुलमान घिसिङ, खेलाडी सरिनारानी घले, मोएय थाइ खेलका खेलाडी संगम गुरुङ, गोर्खा मिडियाका सन्चालक तथा फोटोपत्रकार मिलन तमू, पत्रकार प्रकाश गुरुङलगायतलाई एकसाथ सम्मान गरियो।
