काठमाडौँ । गण्डकी प्रदेशमा सरकारी कामकाजी भाषाको रूपमा तमू भाषा र मगर भाषालाई मान्यता दिने व्यवस्था गर्न बनेको विधयक पारित भएको विषयमा तमू बौद्ध सेवा समितिले गुम्बा परिसरमा छ्यु मी (द्वीप प्रज्वलन) गरेर स्वागत गर्नुका साथै गण्डकी प्रदेश सरकारलाई बधाई ज्ञापन गरेको छ। तमूहरुको मातृभाषालाई सरकारी मान्यता दिनुले समग्र तमू जातिहरु खुसीयाली मनाइरहेको बताउँदै समितिका अध्यक्ष नारायणबहादुर गुरुङले बोलीचाली र अभ्यासको रूपमा पनि ल्याउनुपर्ने बताए।
तमू ह्युल छोंज धींको अध्यक्ष धनमान गुरुङले अझै सञ्चालन कार्यविधि र लिपिबारेमा समेत टुङ्गो लगाइ यसलाई कार्यान्वयनमा ल्याउनुपर्ने बताए। तमू ह्युल उपत्यका प्रमुख कलाकार राजु गुरुङ, महिला सचिव कमला गुरुङ र तमू बौद्ध सेवा समितिका निवर्तमान अध्यक्ष ई ध्रुवबहादुर गुरुङले समेत बोलेका थिए।
