काठमाडौं । प्रधानमन्त्री केपी शर्मा ओलीले आदिवासी जनजाति उत्थान राष्ट्रिय प्रतिष्ठानको उपाध्यक्षमा रेशम गुरुङ नियुक्त गरेका छन् ।
आठ महिनादेखि रिक्त रहेको प्रतिष्ठानको उपाध्यक्षमा प्रधानमन्त्री ओलीले गुरुङलाई नियुक्त गरेका हुन् । प्रतिष्ठानको अध्यक्ष प्रधानमन्त्री रहने व्यवस्था छ । अध्यक्षले उपाध्यक्ष नियुक्त गर्ने व्यवस्था रहेको छ । प्रतिष्ठानको उपाध्यक्ष कार्यकारी रहने गर्दछ ।
संघीय मामिलामन्त्री राजकुमार गुप्ताको संयोजकत्वमा गठित सिफारिस समितिले तीन जनाको नाम सिफारिस गरेको थियो । समितिले गुरुङसहित पासाङ शेर्पा र टासी स्याङ्बो गुरुङसेनीको नाम सिफारिस गरेको थियो ।
सिफारिस समितिमा आदिवासी जनजाति महासंघका अध्यक्ष ग्याल्जे शेर्पा र सञ्चालक परिषदको तर्फबाट सत्यनारायण डंगोल सदस्य थिए ।
तमू ह्युल छोंज धिँ गुरुङ राष्ट्रिय परिषदका पूर्वअध्यक्षसमेत रहेका गुरुङ आदिवासी जनजाति आन्दोलनका स्पष्ट वक्ता हुन् ।
२०८१ जेठ ११ गते गोकुल घर्तीको कार्यकाल सकिएपछि प्रतिष्ठानमा उपाध्यक्षको पद रिक्त थियो ।
